Syvyskuus Burätien Ulan-Ude linnas piettih «Paras muamankielen da literatuuran opastai -2025» kogo Ven’an kilbu. Ozuttamah omii opastajan neroloi da metoudiekkoi komelkymmenel seiččemel kielel Burätieh kerdyi sada opastajua da lapsienkazvattajua Ven’an eri alovehispäi. Heijän joukos oli lapsienkazvattai Natalja Petrova Priäžän Ukonvemmel-päivykoispäi. Tiettäväine, jälles mostu suurdu kilbua meile rodih himo cökähtiäkseh Priäžän päivykodih, kyzellä Nataljan mielii opastajien kilbah näh, da kaččuo kui häi harjaittau lapsii muamankieleh omas päivykois.
