Tämbei minä tahtoižin tundištoitta Karjalan radion kundelijoid ühten vepsläižen neičukaiženke. Hänen nimi om Tatjana Martijanova. Tanja om Petroskoin universitetan 3. voz’kursan üläopenik. Hän om vepsläine. Hänen jured oma Vologdan agjaspäi Šimjärv’-küläspäi. Iče Tanja eläb Petroskoiš. Hän lopi Petrovskijan školan, a sid’ tuli universitetha, opendaškanzi vepsän kel’t. Ani ezmäižes päiväspäi hän tuli Vepsan vezad – vepsläižen norišton organizacijaha. Hän lujas aktivižesti ühtni organizacijan radho, vedäškanzi erazvuiččid vastusid da kucuškanzi niile norid vepsläižid. Ei amu Tatjana Martjanovad valitihe Vepsan vezad — organizacijan pämeheks. A völ Tanja om Barenc Evroarktižen Regionan norišton radgruppan ezitai Vepsän kul’tursebran polespäi.