KARAJALAN MAN RAHVAHALINE KIRJUTAI
Kanman Nikolai Abramovan 60-vottušt jubilejad da hänen muštpäiväd mö möst pagižem vepsläižen runoilijan, kirjutajan Nikolai Abramovan polhe. Sures panendas vepsläižehe literaturaha vodel 2017 Nikolai Abramov oli pauklahjoitud Karjalan man rahvahan kirjutajan arvnimel. Siloi Karjalan Rahvahaližes kirjištos kerazihe hänen navedlijad, arvostajad da laheližed ristitud. Ved’ mugoižen korktan arvnimen Nikolai sai jo jäl’ghe surmad.
Nikolai Abramov oli kirjutai sures kirjaimespäi. Hän mahtoi čomin kirjutada kut venäks, muga vepsän-ki kelel. Hän oli lahjakaz ristit, laskav vel’l’, poig, hüvä sebranik. Meiden radiopaginas Koljan elos, ozas da rados starinoičeba hänen mamoi, sizar da vepsän kelen tedomez’ Nina Zaiceva.
Fotod om ottud Karjalan Rahvahaližen kirjišton internet-gruppaspäi. Fotoiden tegii om Irina Larionova
