Keväz’kun lopus Jamalo-Neneckijas avtonomižes okrugas Salehard-lidnas mäni Vähäluguižiden rahvahiden forum da VIII suim. 600 delegatad, 41 rahvast 28 Venäman agjaspäi keraziba surele vastusele, miše sanuda ičeze holiš, problemoiš da rados Venäman prezidentan abunikoile. Viž vepsläšt Karjalaspäi da üks’ vepsläine Vologdan agjaspäi lendiba necil vastusel ičemoi rahvahan küzundoid pensijoiš, karjeroiš, vepsän rahvahan socialižes da kul’turelos. Vodespäi vodhe problemoid kaikuččes regionas tegese vaiše enambaks. Külis souptas FAPad, školad, kul’turpertid, lapsed ei opekoi maman kel’t ni školoiš, ni päivkodiš. Zakonad vähäluguižiden rahvahiden kaičendas äjiš regionoiš ei rakoi ni man, ni mecan, ni veden, ni karjeroiden, ni opendusen, ni kul’turan, ni socialižen elon poles. Om sel’ged, miše pätta problemoid ühtes päiväs, eskai ühtes vodes nikut ei sa, no sanuda rahvahan problemoiš pämehile tarbiž. Ved’ kut sanub hüvä vepsläine muštatez: „Magadajale kažile hir’ suhu ei jokse.”