Juuri täl päiväl meijän armahal kolliegal, Karjalan radion toimittajal, Videlen karjalazel Anna Usoval on kaunis Jubilei – 50 vuottu. Karjalan radion da televiidenien toimitukseh An’a tuli vuvvennu 1991 da terväh rodieu jo 30 vuottu kui häi ruadau yhtes meijänke. Nämmis vuozis inehmine on luadinuh sadoi kirjallizii paginoi Karjalan tundiettuloin runoniekoin da kirjuttajienke, i nämmä paginat meijän aijal ollah kullan kallehet. Herkysydämelline, hyväntahtoine, vessel, ruadai, ainos valmis abuh – An’as voibi paista äijän. A vie häi on nerokas kirjuttamah, kiändämäh da pajattamah. Sanakse, tämän vuvven allus piäzi ilmah jo toine Anna Usovan kirjutettu runokniigaine “Sie, kus hengele hoivu”. I täl kerdua myö pagizemmo An’anke täh kniigah nähte, livailemmo sen sivuloi, mustelemmo endizii aigoi da kyläelostu. Tiettäväine luvemmo runoloi uvves kniigaspäi.
