Tämbei meil adivoiš om vepsän kelen tundii, opendai, openduzkirjoiden tegii, hüvä mamoi da čoma runoilii Valentina Rogozina. Valentina Rogozina jo äi kerdoid oli Karjalan radion efiras. Nece ristit om tutab äjile Karjalas, hot’ hänen jured oma-ki Piterin agjaspäi, Rebag’ – derüunaspäi. Ved’ valentina Viktorovna jo pit’khä eläb da radab Petroskoiš. Petroskoiš hän openzihe universitetas, lopi suomalaiž-ugrilaižen tedokundan. Opendusen jäl’ghe openzi jo iče üläopenikoid vepsän kel’he Karjalan pedagogižes institutas da Petroskoin universitetas. Valentina Rogozina om äjiden vepsänkeližiden openduzkirjoiden tegii. Nügüd’ hän radab Petroskoin aptekas, no nece rad ei telusta hänele olda vepsläižen, hüvin pagišta vepsäks da kirjutada čomid runoid lapsile. Hänen runoiden polhe linneb-ki tämbei meiden pagin. Ei amu laksi eloho Valentina Rogozinan toine runokirj lapsile. Kirjan nimi om Meceläjiden polhe. Sen polhe pagižem-ki tämbei.