VOLOGDAN AGJAN VEPSLÄIŽED

  • от редакции
  • 04.02.2021
  • 275

VOLOGDAN AGJAN VEPSLÄIŽED
Jäl’gmäižen lugetišen mödhe, mitte oli tehtud kümne vot tagaze, Vologdan agjas oli 412 vepsläšt. Äjak vepsläižid eläb nügüd’ Vologdan agjas, jo pigai ozutab uz’ Venäman rahvahan kirjutamine. Om sel’ged vaiše se, miše eläjid vepsläižiš küliš Vologdan agjas vodespai vodhe tegese vähembaks. Küliš om vähän radod. Norišt lopib školan, ajab opendamhas surehe lidnaha. Sinna jäb-ki.
Ol’ga Balaban om Vologdan agjan, Babajevon rajonan Kujan školan opendai. Täl vodel necile školale täudui 95 vot. Iče Ol’ga openzihe Karjalas Petroskoin institutas, a jäl’ghe opendust tuli radole kodikuläha Kujaha. Jo enamb 20 vot hän radab külälaižes školas. Hän om anglijan kelen da augotižklassoiden opendai. Minä vastsimoi Ol’ganke internetan kal’t, mö pagižim hänen eloazjas, Kujan školas da vepsän kelen da kul’turan kaičendas Vologdan mal.